Duha ka sunog ang gialarma sa kabomberohan sa dakbayan sa Mandaue nga nahitabo sulod sa 24 oras niadtong Biyernes apan wala makaulbo kay dali kining gipawong sa nagtinabangay nga mga silingan. Kini ang nasayran sa Banat News kagahapon gikan kang SFO1 Julius Lloa sa Bureau of Fire Protection (BFP) sa dakbayan sa Mandaue .
Nianang kaadlawon maoy gialarma sa kabomberohan sa dakbayan ang nasunog nga balay ni Mario Lua sa Kimwa, sa barangay Subangdaku.
Dali kining gipawong sa mga bombero uban sa mga nagtinabangay nga mga lumolupyo.
Ang kalayo nagsugod sa kusina ni Lua dihang kalit lang nga misiga ang outlet nga gihansakan sa kuryente sa iyang refregirator.
Laing sunog usab nga gialarma nianang pagkahapon didto mahitabo sa sitio Lapyahan sa barangay Labogon nga mga managsilingan gihapon ang nakapawong.
Si SFO1 Lloa miingon nga kun wala pa mapawong, posible nga daghang kabalayan ang maangin kay gawas nga nagsikitsikit kini, pulos pa gayod mga ginama sa light materials.