Wala mobayad sa giinom giulo pagpusil sa tag-iya

Usa ka lalaki ang gipusil sa ulo ug namatay human kini og mga higala misibat sa bayrunon human moinom sa usa ka videoke bar diha sa barangay Sta. Cruz lungsod sa Balamban niadtong Miyerkules sa alas 11:55 sa gabii.

Patay nang naabot sa Balamban District Hospital si Larry Piedad, 31, taga barangay Ibo siyudad sa Toledo human kini pusila sa tag-iya sa PJ Videoke bar nga si Emie Cristoria sa maong dapit.

Matud ni PO1 Alby Agua sa Balamban Police dihang nahinabi sa Banat News kauban sa biktima sila si Bryant Bendanillo, 25, silingan sa namatay ug Marvin Basera, 24 taga Upper Riverside, Arpili lungsod sa Balamban.

Gikatahong human mainom ang duha ka botelyang beer nagdungan ang tulo og pagpamarog aron molakaw, apan ang tindera nga nakabantay daling misingil kanila sa ilang bayad nga P140 sa duha ka beer apan ang tulo wala mopatuo ug nideretso gyud sa paglakaw.

Daling nisumbong ang tindera sa suspek nga naghigdahigda sa sulod niadtong higayuna ug sa paggawas nagbitbit na kini sa iyang armas nga kalibre .45 dayong gipasalbahan ang tulo.

Apan imbes nga mopatuo nilahos gyud sa paglakaw ang tulo hinungdan nga gipusil kini sa suspek ug naigo sa ulo ang  biktima samtang daling mikaratel og panagan ang mga kauban niini.

Sa paghimo ning balita padayun pa ang imbistigasyon sa kapulisan pagsikop sa suspek nga daling nisibat human sa hitabo sakay sa iyang sakyanan sa direksyon sa lungsod sa Balamban.

Ang kapulisan nakarecover og duha ka kabhang sa bala sa kalibre .45 sa crime scene.