Laing 2 'kinarnap' gisakmit

Laing duha ka sakyanan nga gituuhang ‘hot cars’ gihapon ang nasakmit sa hiniusang pwersa sa Provincial Intelligence and Investigation Branch sa provincial police ug Criminal Investigation and Detection Group-7 kagahapon diha sa dakbayan sa Talisay kagahapon sa hapon.

Ang maong mga sakyanan nasakmit diha sa barangay Dawis sa duol sa panimalay ni Lito Pastolo, nga sumala pang Supt. Juanito Enguerra, deputy chief sa CIDG-7,  drayber ni Reynold dela Torre.

Si dela Torre maoy gitumbok nga tag-iya sa 13 ka mga sakyanang nasakmit sa mga sakop sa Quezon City police ug Regional Investigation Division diha sa barangay Tisa ug ingon man sa laing unom ka sakyanan nga nasakmit usab sa Mandaue City Police Office sa barangay Banilad sa dakbayan sa Mandaue.

Matud pang Enguerra sa pakighinabi sa Banat News kagahapon wala diha si Pastolo apan ang asawa niini mitug-an kanilang drayber ang iyang bana ni dela Torre ug ang duha ka sakyanang gisakmit iya sa naulahi.

Ang gisakmit sa kapolisan mao ang usa ka Fortuner nga kolor itom nga may plakang YDC-961 ug Ford Everest nga kolor brown nga may plakang YCZ-881.

Matud pang Enguerra nakadawat sila og impormasyon kabahin sa maong mga sakyanan nga giparking dili layo sa panimalay ni Pastolo ug dihang ilang gi-check ang mga plaka niini diha sa Land Transportation Office-7 nasutang wala kini marehistro.

Usa sa dugang nadiskubrehan karon sa kapolisan mao nga ang maong mga plaka base sa gibutyag sa LTO kanila nga wala pa nila mahimo ang maong mga plaka, nagduda karon si Enguerra nga posibleng dunay mga tawong iligal nga naghimo og mga plaka ug mao karoy gipanggamit sa mga kinarnap nga sakyanan.

Gibutyag ni Enguerra ang usa sa mga modus operandi sa mga carnapping syndicates kini pinaagi sa pag-abang og house and lot ug himoan kini og titulo sa sindikato aron gamitong collateral sa bangko alang sa car loan, human makuha ang sakyanan ilahang papason ang chassis number ug engine number aron ilisan ug irehistro og balik una pa mosibat.

Giawhag ni Enguerra ang mga bangko nga kung dunay ma-foreclose nga car loan angayang ila kining itug-an dayon sa CIDG-7 aron masusi dayon tungod kay posibleng biktima na sila sa maong modus operandi.

Samtang ang deputy chief sa Regional Highway Patrol Group-7 nga si Sr. Insp. Simplicio Torredes sa pakighinabi sa mga tigbalita kagahapon nagkanayon nga walay koordinasyon ang mga sakop sa Quezon City police nga mironda ug misakmit sa 13 ka sakyanang gidudahang kinawat didto ug gidala dinhi sa Sugbu.

Gisusi na karon sa HPG-7 sa Vehicle Identification Management System ug tanang records sa maong mga nasakmit nga sakyanan aron isuporta sa kihang carnapping unya batok sa mga suspek.