Tawo gitulis gibun-og

Mga samad ug bun-og ang naangkon  sa usa ka tawo kinsa gitulis ug gikulata sa duha ka wala hiilhing armadong lalake   nga nagsakay og taksi  sa reclamation area sa barangay Subangdaku, dakbayan sa Mandaue sa miaging gabii.

Ang biktima mao si Chars Villar, 49, minyo nga taga Nonok, dakbayan sa Talisay . Nakuha sa mga tulisan gikan sa biktima mao ang  iyang mahalon nga cellphone ug  salapi nga nagkantidad og P2,200 ug uban pang importanteng dokumento sulod sa iyang pitaka.

Sa imbestigasyon nga gihimo nila ni SPO3 Alfredo Andales sa Mandaue City Police Station  nahibaw-an nga nagpaabot ang biktima og PUJ sa north bus terminal sa Subangdaku, alas 9:00 pasado ang takna sa kagabhion.

Dihang kalit kining gihunongan sa puti nga taxi nga giluwanan sa usa ka pasaherong lalake kinsa nagdali sa pagkanaug ug gipugos siya sa pagpasakay niini.

Dugang pa ni Andales nga gidala ang biktima sa reclamation area ug didto sa maong dapit gitabangan kinig kulata ug gikuhaan sa iyang pitaka nga gisudlan sa iyang salapi uban sa iyang Nokia cellphone.

Human siya kulataha gibiyaan siya sa mga tulisan kinsa mipasirit sa ilang sakyanan ug wala gyud hisakpi sa kapolisan.