Gisugdan na sa pagtukod ang usa ka edipisyo alang sa mga batang libodsuroy ug wala nay nag-atiman nga ginikanan sa Barangay Gun-ob dakbayan sa Lapulapu.
Ang maong proyekto gitawag nga “Home Care Center for Children” nga gipangulohan ni Mactan Barangay Chairman Hon. Paz Radaza kinsa mao usab ang Chairman sa Local Council for Women, Children’s Protection and Nutrition sa dakbayan sa Lapulapu.
Matud pa ni Radaza nga dugay na nila kining giplano apan nagpasalamat siya sa mga sakop sa konseho sa dakbayan sa Lapulapu nga gipangulohan usab ni Konsehal Dr. Conellio Pahang ang Chairman sa Committee on Health sa paglig-on sa gahin nga P8 milyones alang sa katukoran sa maong proyekto.
Kini maghatag og kahigayonan sa mga kabataang walay kapaingnan nga nagsuroysuroy nalang sa kadalanan ug wala na atimana sa ilang mga ginikanan aron kahatagan og maayong kaugmaon inabagan sa Department of Education (DepEd) ug sa Department of Social Welfare and Development (DSWD) nga maoy modumala sa maong sentro.