Brgy. Jugan pasidunggan

Ang barangay Jugan sa lungsod sa Consolacion nga ubos ni Barangay Kapitan Diosdada Gielczyk maoy giila nga “most disciplined barangay” sa tibuok Central Visayas sa Regional Police Office (PRO) 7 niining tuig 2007.

Ang maong barangay pasidunggan karong Lunes sa sunod semana atol sa pagahimoong awarding ceremony diha sa Camp Sergio Osmeña Sr. sa dalan Osmeña Blvd.

Ang pag-ila isip “most disciplined barangay” gibase sa evaluation nga gihimo sa kabarangayan dinhi sa Central Visayas sa nangaging mga bulan subay usab sa rekomendasyon sa mga hepe sa lokal nga kapolisan sa Central Visayas.

Nunot usab kini sa gihimong rekomendasyon ni Inspector Leoncio Baliguat Jr., hepe sa kapolisan sa maong lungsod kinsa mipili sa barangay Jugan gikan sa 21 ka mga barangay sa maong lungsod.

Naglakip sa gibasehan sa pag-ila sa maong barangay nga most discipline mao ang higpit nga pagpatuman sa kalimpiyo, kalinaw ug drug free ug hingpit nga napakgang ang vandalism ug uban pa.

Samtang apil usab sa gitan-aw ang mga barangay tanod nga kung magsuot ba sa ilang hustong uniporme panahon sa ilang trabaho.

Si Kapitan Gielczyk nga nahinabi sa Banat News ang mipadayag nga ang pag-ila sa ilang dapit nga most discipline barangay maoy bunga sa ilang pagtinabangay nga mga opisyal ug sa mga lumolupyo nga nagsuporta usab sa gipatuman niyang mga programa.