3 ‘tulisan nasikop

Nasikop na sa mga sakop sa Criminal Investigation and Detection Group (CIDG-7) ang tulo ka mga suspetsado sa pagtulis sa RKS gasoline station sa Sitio Looc barangay Poblacion lungsud sa Lilo-an.

Ang gibalhog sa karsel sa CIDG-7 mao sila si Renante Barbero, 27, taga barangay Tag-ubi, Compostela ug security guard sa maong gasoline station nga sakop sa Extreme Force Security Service, Martin Igot, 24, pumpboy nga taga Masbate, ug cashier nga si Jane Marie Satilleza, 20, taga Ponce Compound, barangay Carreta ning dakbayan.

Samtang ang gipangita pa mao sila si Albet Allava, 20,  alyas Burlaw, taga barangay Central Compostela  nga usa ka konduktor sa PUJ, Clifford Loveras, kaubang security guard taga Pilar, Isla sa Camotes.

Si Supt. Rex Derilo ang hepe sa Special Operation Team sa CIDG-7 nipadayag nga wala pa mahuman ang maong kaso gumikan kay padayon pa nilang gipangita ang duha pa ka mga suspetsado.

Sumala pa ni Derilo nga ang cashier nga si Satilleza mikooperar  kanila labot sa maong imbestigasyon ug gumikan kay na pressure na usab sa maong krimen.

Kini maoy gihimong guide sa pagpanulis gumikan kay kini maoy nahibalo kun kanus-a ideposito ug pila ang gisulod nga kwarta sa vault, sumala pa ni Derilo.