Chop-chop suspects gi-inquest

Naduso na kagahapon sa hapon ang kasong double murder case batok nilang Joseph Roy Cellar alyas Jojo delos Reyes, Richard Gudelosao ug Jean Antonette Medalle nga gipasanginlang maoy mi-chop-chop sa lawas nilang Maria Eva Mae Peligro ug ig-agaw niining si Gwendolyn Balasta niadtong Huwebes sa hapon.

Nasang-at sa buhatan ni Talisay City Prosecutor Marcial Rubia ang kaso mga alas 4 sa hapon.

Silang Cellar, Gudelosao ug Medalle misugot kagahapon nga iduso na lang sa korte ang kaso human sa inquest proceedings nga gihimo sa buhatan ni Rubia.

Si Medalle miasoy atol sa inquest proceedings nga wala siya’y kalibutan sa gihimo nilang Gudelosao ug Cellar tungod kay igo siyang gikuha sa iyang pinuy-anan sa Lahug ug gisultian na lamang siya sa gibuhat sa duha sa dihang nagsakay na siya sa taxi.

Giangkon hinuon ni Medalle nga gipalimpyo siya ni Gudelosao sa banyo sa taas sa balay tungod kay aduna pa kini dugo.

Si Cellar miluwat og affidavit nga nag-angkon sa krimen.

Nagubot kagahapon ang inquest proceedings tungod kay buot pasakitan sa banay sa gipang-chop-chop nga mga babaye ang mga suspetsado.