Mga makililimos subling panakpon

Subling hingusgan sa kagamhanan sa dakbayan sa Sugbu ang pagsikop sa mga makililimos sa kadalanan sa siyudad sugod niining semanaha.

Kini maoy gibutyag ni Konsehal Rodrigo  Abellanosa, ang chairman sa Committee on Social Services sa konseho sa dakbayan.

Gawas sa mga makililimos, ilakip unya sa pagsikop ang mga tawo nga masakpang mohatag og limos diha sa kadalanan tungod kay ang Anti-Mendicancy Ordinance sa siyudad giingong magsilot usab niadtong mga tawo nga masakpang mohatag og limos.

Matud sa konsehal nga ang nahisgutang lakang maoy kabahin sa pag-obserbar sa Anti-Mendicancy Month sa siyudad sunod buwan.

“Ang Paghatag Maayo Apan Sa Dalan Dili Husto,” mao gihapon ang tema sa pag-obserbar sa siyudad sa Anti-Mendicancy Month niining tuiga.

Gipadayag ni Abellanosa nga ilang ilakip usab sa pag-rescue ang kabataan nga naglatagaw sa kadalanan nga gipasagdan lang sa ilang mga ginikanan.

Gitataw sa konsehal nga ang paghipos sa mga makililimos gihimo nila matag adlaw, apan kini ilang hingusgan sugod karong adlaw   Biyernes.

Kini aron sa pag-highlight usab sa Anti-Mendicancy Month nga giobserbar sa siyudad kada buwan sa Agosto matag tuig.
Giangkon ni Abellanosa nga lisod sumpuon ang mga makililimos sa dakbayan apan ilang gitinguha nga kini makontrolar ug dili mudaghan.

Ang komitiba sa konsehal nakig-alayon   sa mga Non-Governmental Organization (NGO’s) aron maoy pasagupon sa mahipos nga makililimos.

Sa pikas bahin, giawhag ni Abellanosa ang ubang ahensya sa gobyerno ug pribadong mga establisamento nga moduyog sa siyudad pag-obserbar sa Anti-Mendicancy Month.

Kini pinaagi usab sa pagpasiugda og mga kalihukan nga mag-discourage sa mga makililimos sa ilang naandan nga kalihukan.