SWAT Mandaue vs wanted nagpinusilay; kawani patay

Patay ang usa ka kawani sa city hall sa dakbayan sa Mandaue nga napagan sa pinusilay sa mga sakop sa Special Weapon and Tactic (SWAT) batok sa usa ka wanted   sa kasong  robbery.

Ang pinusilay nahitabo sa sitio Ilog sa barangay Opao, dakbayan sa Mandaue alas 8 pasado ang takna sa miaging Sabado sa gabii.

Ang namatay mao si Arnulfo Maglasang, 46, minyo nga taga sitio Liong, barangay AlangAlang sa maong dakbayan ug kawani sa city hall sa Mandaue nga gidistino sa Mandaue City Police (MCPO) isip  civilian employee.

Ang suspetsado nga nakigpinusilay sa mga polis  mao si  Dandie  Sungahid,   nagpuyo sa maong dapit.

Si SPO3 Arturo  Manaling Jr., sa Investigation and Detective Management Bureau  (IDMB) sa kapolisan sa dakbayan sa Mandaue nga nahinabi sa  Banat News miingon nga nakadawat og text message si  Maglasang nga nagpahibalo   nga nahiuli sa ilang panimalay si Sungahid.

Matud pa niya dali nga nakapahibalo si Maglasang sa buhatan sa SWAT sa MCPO ug maoy nakatubag sa alarma sila si PO3 Sandy Roble, PO3 Isagani Cabanlit ug PO1 Gerry Gascana.

Matud pa ni Manaling nga nakamatikod sa paghidangat sa  SWAT si  Sungahid ug dali kining nakapahiluna sa pagtago ug girakrakan  ang mga polis ug suwerte na lang kay dali silang nakahupo ug nakatago sa pagseguro sa kaugalingon dungan ang ilang pagbalos og pabuto.

Si Maglasang nga kuyog sa mga polis isip giya sa pagtultol sa panimalay nga nahimutangan ni Sungahid   kalit lang nahagba sa yuta dihang maoy naigo sa maong pagpamusil ug namatay.  

Nakadagan na unta si  Sungahid alang sa pagpahilayo sa maong dapit apan gigukod kini sa mga SWAT hangtod nga misulay kini og katkat sa koral alang unta sa paglayat apan naigo sa pagpusil sa mga polis ang kamot nga maoy hinungdan sa pagkatagak sa yuta hinungdan sa pagkasikop.