Kadagkuan sa OSC, warden pa-esplikahon ni Margot

Pa-isplekahon sa unang ginang sa dakbayan sa Sugbu, Margot Osmeña ang kadagkuan sa Operation Second Chance partikular na ang warden niini.

Kini tungod usab sa pag-eskapo sa pipila ka juvenile inmates diha sa nahisgutang sentro niadtong miaging Biyernes sa gabii.

Ang unang ginang sa siyudad nga sakop usab sa management team sa Operation Second Chance buot masayod nganong nakagawas sa sentro ang mga minor de edad.

Wala na hinuon masurpresa si Margot sa gihimo sa mga juvenile inmates tungod kay kini giingong gihimo usab sa ubang minor de edad bisan sa sulod sa ilang pinuy-anan.

Dali hinuong nasikop pagbalik sa mga guwardiya ang upat ka mga menor de edad nga nieskapo ug gipabalik dayon sa sentro.

Nasayran gikan sa warden sa Operation Second Chance, Sr. Inspector Merlina Metante nga wala pay napahigayon nga imbestigasyon labot sa maong hitabo.

Miingon hinuon si Metante nga posibleng karong adlawa kasugdan ang imbestigasyon nga himuon sa Bureau of Jail Management and Penology (BJMP-7).

“Masugdan na siguro ang imbestigasyon karong lunes kay nihangyo na man mi sa Investigation and Intelligence Division sa among regional office alang ana,” matud ni Metante.

Kahinumduman nga si Metante maoy nihulip kang Senior Inspector Joyce Abar pagka-warden sa Operation Second Chance niadtong Nobiyembre 21 sa miaging tuig.

Kini dihang wala makauyon si Margot sa giingong pagsuway og lilong ni Abar kaniya, dihang mi-eskapo ang pipila usab ka juvenile inmates diha sa nahisgutang sentro.

Ang Operation Second Chance duna karoy 93 ka mga menor de edad nga gipaubos sa rehabilitasyon tungod sa nagkadaiyang krimin nga gilambigitan niini.