Dugang 87 ka kawani sa Sulpicio gitangtang

Laing 87 ka mga kawani sa Sulpicio Lines Inc., ang gitangtang sa ilang mga trabaho gumikan sa epekto sa nagpadayong ban sa kagamhanan nga makabalik og biyahe ang mga barkong cargo-passenger niini.

Si Joy Lim, information officer sa Cebu-base Associated Labor Unions-Trade Union Congress of the Philippines (ALU-TUCP) miingon nga ang 87 ka mga kawani nga gitangtang sa ilang trabaho mao ang mga crew sa tulo ka mga barko nga naglakip sa Princess of the Caribbean, Cagayan Princess ug Palawan Princess.

Ang maong tulo ka mga barko nga gi-grounded sa kagamhanan nga tua sa pantalan sa Manila.

Samtang duna say mga cargo vessels ang gipaubos sa inspection sa Maritime Industry Authority. Hinuon giklaro  nang daan atol sa pagsuspenso nga walay labot sa gi-ban ang walo ka cargo vessels sa SLI.

Si Marina administrator Raul Suazo dihang gihinabi sa lokal nga media sa sayo ning bulana daan nang miklarong wala maapektahi sa ban ang cargo vessels, ug kadto rang barkong i-inspection ug ma-audit di lang sa SLI kundili lakip na ang sa ubang shipping firms mao ray di pabiyahion ug kun mahuman ug makapasar makabalik sila sa ilang operasyon.

Ang tanang barkong cargo-passenger sa SLI ang gi-grounded sa kagamhanan human sa pagkalunod sa M/V Princess of the Stars sa kadagatan sa Sibuyan Island sa lalawigan sa Romblon atol sa pagkusokuso sa bagyong Frank sa miaging bulan.

Si Lim miingon nga kasamtangang natanggong sa buhatan sa SLI sa Manila ang nangataktak nga crew ug nagpaabot pa ilang tiket ug makauli dinhi sa Sugbo.

Kahinumdoman nga ang mokabat sa 141 ka mga kawani sa SLI ang nawagtangan usab og trabaho sa miaging semana.

Gitataw ni Lim nga dili nila mabasol ang shipping firm sa gihimo niini ngadto sa mga kawani sanglit kini moresulta man sa pagkaalkanse sa nagpibilin nga pagdili sa pagbiyahe sa mga barko niini.