SONA sugaton og protesta

Dunay halapad nga lihok-protesta ang ilusad sa mga militante ug mga mamumuong pundok dinhi sa Sugbu sugod alas 8 sa buntag karong buntag aron pagsaway sa State of the Nation Address ni Presidente Gloria Macapagal Arroyo.

Ang mga raliyista mag-abot diha sa Plaza Independencia ug moadto sa Malacañang sa Sugbu. Duna say laing mga pundok nga mopahigayon og kalihukan sa Fuente Rotunda ug dalan Colon.

Ang Alliance for Progressive Labor-Cebu (APL) Akbayan Citizen’s Party ug uban pang pundok mag-rally isip pagsalikway sa ika-walong SONA ni Arroyo.

Dunay himuong “alternative SONA” ang mga raliyista ug giawhag ang mga Sugbuanon nga kini paminawon ug dili lang ang kang Arroyo kinsa mamahayag niini diha manukad sa Batasang Pambansa.

Matud pa sa mga militante pulos unya mga bakak ang ipamulong ni Arroyo karong hapon ug wala makahatag og kaayuhan sa kinabag-an.

Si Kim Carisma lider sa women sector Makalaya nipadayag nga pakyas si Arroyo pagprotiher sa kababayen-an.

Samtang si Joe Tomongha ang leader sa APL nipadayag nga napakyas usab ang pangulo kung ang seguridad sa mga mamumuo maoy hisgutan sanglit wala niini matuman ang gisaad nga 1.6 milyones nga trabaho alang sa katawhan.

Sa laing bahin giisa na kagahapon ngadto sa heightened alert sugod alas 8 sa buntag ang kapolisan sa lalawigan agi’g pagpangandam sa SONA karong adlawa.

 Sama sa naandan, si Sr. Supt. Patrocinio Comendador nagkanayon nga wala na kinahanglana sa Cebu City Police Office nga dunay permit to rally ang mga militante apan kini mipasidaan basta di lang sila momugna og kasamok ug mangguba sa kabtangan sa gobiyerno ug pribadong sektor walay mahitabong gubot.

Nahibaw-an na usab daan sa kapolisan ang converging point sa mga militante ug ilaha na usab kining gipangandaman, dunay mga platoon sa kapolisan ug kabomberuhan ang giandam isip crowd dispersal management.

Samtang sa probinsya sa Sugbu higpit nga ipatuman ang no-permit no-rally policy alang sa seguridad sa katawhan sumala pang Sr. Supt. Carmelo Valmoria.

Hinuon kaniadto pa wala makasinati og mga problema ang CPPO sa mga lihok protesta sa mga militante apan duna gihapoy ipakatap nga mga sakop aron maniid sa palibot. (Ug Guam Logroño)