Mga baligya giputos na og ginagmay

Giangkon sa mga negosyante nga gipamutos nila og ginagmay ang ilang mga baligya aron maapas sa mga pumapalit ang presyo niini.

Si Robert Go, presidente sa Prince Warehouse Club Inc., mipasabot nga ilang gihimo kining paggamit sa (sachet pack) o pagpamutos og ginagmay kay gawas nga maabot ang prisyo sa tawo makadaginot usab ang mga pumapalit.

Matud pa niya nga ila kining gihimo kay gipahaom lang nila sa gikinahanglan sa mga pumapalit.

Si Go mitambong  sa Sari-Sari Festival sa sulod sa Cebu International Convention Center (CICC), usa ka pasundayag sa nagkalainlaing produktong  baligya nga gipakita sa l,500 ka mga tag-iya og sari-sari store gikan sa nagkalainlaing dapit ning lalawigan.

Lakip sa mga produkto nga ilang gieksibet unya gipamutos na og ginagmay mao ang  shampoo, sabon, toothpaste, nga maoy sagad gigamit karon sa mga hotel ug mga motel dinhi sa nasud.

Gawas niini, gipasundayag usab nila ang ginagmay nga putos sa gatas, powdered juice, cooking oil, suka, soy sauce, sandwich spread, deodorants, ug bisan gani ang shoe polish.

Gipasabot ni Go nga ang mga tiggama sa maong nga produkto  mituyo sa paggamit og gagmay’ng putos niini aron naa gyu’y mapalit ang mga katawhan nga butang nga dili usab kaayo bug-at sa ilang bulsa ug sayon ra kaayong gamiton.

Ang Sari-Sari Festival gitambongan  usab ni Senador Mar Roxas.