Upat ka mga menor-de-edad nga na-rehab diha sa Operation Second Chance ang namuga niadtong Biyernes sa gabii apan way suwerteng nasikop pagbalik human masigpati sa tower guard ang duha pa nila ka kaubang wala makakatkat sa paril.
Si Insp. Merlina Metante, Warden sa maong rehab sa pakighinabi sa Banat News nagkanayon nga si JO1 Joel Bantaya nakabantay sa duha ka menor diha na sa perimeter fence hinungdan nga iya kining gisitar ug gikanaog.
Diha-diha gihimo dayon ang “bilang” ug gisundan og greyhound pagpangita og kontrabando nga miresulta sa pagkakumpiskar sa usa ka kapin duha ka pulgadas nga putol nga gabas sa puthaw nga gisumpayan og kahoy ug gihiktan og pinutol nga panapton sa habol.
Sumala pang Metante dunay 93 ka inmates ang OSC apan human sa “bilang” kulang na kini og upat apan niadtong higayuna migukod nang daan ang jailguards nga sila si JO2 Renante Ramirez inabagan sa tanod sa Kalunasan nga si Dioscoro Lagnasan.
Ang nakapuga nga nagpangidaron pa tanan og ubos sa 18-anyos naabtan diha sa Happy Valley sa barangay Kalunasan ug gibalik og sulod sa OSC.
Duha sa mga bata second timers na sa OSC sa kasong theft, ang usa kasong robbery ug ang usa kasong rape sa Toledo City.
Matud pang Metante giputol sa upat ang flat bar sa ibabaw nga bahin diha sa bintana ug kini pugsanong gibawog hangtud nga naputol ug diha sila nangagi pagawas.
Sumala pa niini kung wala pa mabantayi dayon ni Bantaya ang pagpuga hayan mahurot og panggawas ang mga bata apan bisan paman niini duna gihapoy imbestigasyon nga himuon batok sa duty staffs niadtong gabhiuna.