Lawas sa usa ka babaye nga gitagod-tagod na ang nagkadaiyang parte nakit-an na lang nga gilabay daplin sa sapa sa bukirang bahin sa barangay Campo 8, sakop sa lungsod sa Minglanilla alas 11 kagahapon.
Gikakurat sa mga tawo ang pagkakaplag sa maong lawas nga nagkabulagbulag na ang nagkadaiyang parte tungod kay gitangag na sa iro ang usa ka kamot samtang nasuta nga gipikas ang kinatawo niini.
Matud ni PO2 Avelino Celoria sa Minglanilla Police Station nga maoy usa sa miresponde sa nahitabuan mitug-an sa dihang nahinabi sa Banat News nga ang mga bata nga estudyante nga gikan nanggawas sa klase nga miagi sa lugar maoy nakakita sa kamot sa tawo nga gitangag sa iro.
Kini maoy hinungdan nga na-alarma ang mga molupyo sa maong lugar ug gi-report dayon ngadto sa mga opisyal sa barangay ug mao nay mipahibalo sa kapolisan.
Matud ni PO2 Celoria nga sa ilang pag-abot sa lugar ilang nakit-an ang na-chop chop nga lainlaing bahin sa lawas sa biktima nga usa ka babaye nga napikas na ang kinatawo niini.
“Ang among nakit-an pagkakaron kaning duha ka tiil nga giputol dapit sa bugan, putol pud sa hawak dapit sa pusod ug tuo nga kamot,” dugang asoy ni PO2 Celoria. Apan matud ni PO2 Celoria nga wala pa kini labot sa usa ka plastik nga kolor itom nga dili ma klaro ang sulod nga diha sa tupad nga gituohan nila nga sulod niini ang ubang bahin sa lawas sa biktima.
Gihulagway ni PO2 Celoria nga usa ka babaye ang biktima ug nagtuo siya nga usa pa kini ka bata tungod kay gamay pa man ang kamot niini nga gitangag sa iro.
Dugang nahipos nga impormasiyon sa kapolisan nga dunay tulo ka tawo nga nakakita, usa niini ang kagawad mismo sa barangay Campo-8 nga sakop sa siyudad sa Toledo nga si Carlito Pardillo, sa usa ka taxi nga mihunong og mga tres minutos sa maong lugar ug pagkahuman mipasirit kini paingon sa sitio Manipis, Tabunok, Talisay nga habig.
Gibutyag usab ni Kapitan Sotera Abao, sa Campo-8 Minglanilla sa dihang nahinabi sa Banat News nga gikan sa Lutopan, siyudad sa Toledo ang maong taxi nga mihapit sa lugar alas 4 kagahapon sa kaadlawon.
Gidugang usab ni PO2 Celoria nga subay sa iyang pagsukitsukit gikan kang Pardillo nga naglingkod na siya daplin sa karsada niadtong higayuna kauban ang laing duha ka tawo sa dihang mihunong ang maong taxi og kadali ug pagkahuman mipasirit dayon pahilayo sa lugar paingon sa Lutopan, Toledo.
Sa paghimo ning balita padayon pa ang pakisusi sa kapolisan pag-ila sa biktima ug sa mga responsable sa pagpatay niini.