2 ka Crips nadakpan

Duha ka sakop sa Crips gang nga suspetsado sa pagpusil patay ug miangol sa lain niining kauban sa Nangka, Consolacion ang nadakpan sa miaging gabii didto sa barangay Poblacion, lungsod sa Catmon.

Ang nadakpan mao sila si Paul Pitogo alyas Marven, 18 anyos ug Noel Anthony Velasquez, 23, nga pulos lumolupyo sa barangay Alang-Alang, dakbayan sa Mandaue.

Ang duha ka mga dinakpan maoy suspetsado sa pagpusil patay kang Christian Cuadra, hingkod ang panuigon nga taga sitio Latasan sa barangay Nangka, Consolacion ug higala niini nga si Kevin Amaga nga taga sitio San Antonio sa barangay Jagobiao sa dakbayan sa Mandaue.

Si Inspector Leoncio Baliguat Jr. nga maoy hepe sa kapolisan sa maong lungsod maoy nangulo sa team sa kapolisan nga nagdakop sa mga suspetsado.

Ang mga polis nga kuyog ni Baliguat mao sila si  PO3 Georame Espinosa, PO3 Serwin Leyson, PO2 Ruben Alin ug PO2 Cecilio Meñoza.

Si SPO2 Rizalino Aligno nga nahinabi sa Banat News miingon nga dali nga mipaingon sa lungsod sa Catmon sila si Inspector Baliguat human nila madawat ang taho kalabot ni Pitogo ug Velasquez nga misibat paingon sa maong dapit.

Si Aligno miingon nga nasakmit usab nila ni Inspector Baliguat ang kalibre .38 snub nose, uban sa duha ka buhing bala nga maoy gigamit nga hinagiban sa pagpatay kang Cuadra ug miangol usab sa kauban niining si Amaga.

Kahinumdoman nga nahitabo ang pagpamusil sa miaging Domingo sa hapon sa panimalay sa namatay nilang higala sa Latasan, Consolacion nga gitakdang ilubong niadtong adlawa.

Matud pa ni SPO2 Aligno nga gikaaway ni Cuadra ang igsoon sa mga suspetsado hangtod nga misangko sa duguong panghitabo.