Construction worker gidul-ita'g pusil sa nawong

Gisaka sa taas sa balay samtang natulog ug gidul-itan sa pagpusil ang usa ka construction worker nga gidudahang nakontrahan sa iyang mga kauban sa trabaho didto sa Sitio Lutao, barangay Tuble, lungsod sa Moalboal niadtong Martes sa alas 3 sa kaadlawon.

Ang biktima mao si Raymundo Ampurado,44, ulitawo, usa ka construction worker ug molupyo sa nahisgutang lugar.

Matud ni Insp. Rolly Lauron, hepe sa Moalboal Police Station sa dihang nahinabi sa Banat News nga samtang natulog ang biktima sa pinuy-anan sa iyang ig-agaw niadtong higayona gisekreto kini og saka sa suspek nianang pagka- kadlawon.

Mao na lay namat-an sa biktima ang duha ka sunod sunod nga boto sa armas nga wala pa matino ang kalibre ug namatikdan   niya nga hapit modapat sa iyang nawong ang tumoy sa armas nga gition kaniya.

Maayo na lang gani kay nakahunahuna og ligid paingon sa pikas daplin nga kwarto ang biktima nga nakasurpresa sa suspek ilabi na kay nahigmata na usab niadtong tungora ang ubang mga nagpuyo sa balay sa pikas kwarto.

Tungod sa kangitngit sa palibot wala na maklaro sa biktima ang panagway sa suspek ingon man sa mga nahigmata nga kauban niini sa balay ug paglabay sa pipila ka gutlo namatikdan niya nga mihapdos ang iyang lawas ug didto pa niya namatikdi nga naka-angkon siya og samad pinusilan sa walang bahin sa iyang dughan ug milapos ang bala sa iyang likod.

Gawas niini nakaangkon pa gyud og mga paso paso ang nawong sa biktima agi sa powder burns tungod sa kaduol sa pagpusil kaniya.

Matud ni Insp. Lauron “work related” ang gisubay karon nila nga motibo sa nagpadayong imbestigasyon ilabi na kay nakahipos og impormasyon ang kapulisan nga posibleng gisuyaan kini sa trabaho.