Aksidenting natagak sa lawom nga pangpang ug patay nang nakit-an ang usa ka construction worker samtang naglakaw kini sa dalan sa usa ka quarry site paingon nga mopauli gikan sa trabaho didto sa barangay Guindaruhan, lungsod sa Minglanilla alas 7 sa gabii niadtong Sabado.
Ang patay na’ng nakit-an sa mga molupyo sa lugar nga nagbuy-od na sa kabatoan sa ubos nga bahin sa maong pangpang nga dunay gibana banang 120 metros ang gilawmon mao si Mario Engcoy, 54, nagpuyo sa sitio Kabuwan, sakop sa nahisgutang barangay.
Subay sa inisyal nga imbestigasyon sa kapolisan si Engcoy trabahante kini isip construction worker sa JLR company nga nagbase sa Tingub, siyudad sa Mandaue.
Matud pa gikan kini sa trabaho ug paingon na untang mopauli sa ilang pinuy-anan sa maong lugar niadtong higayona ug sa pag-agi sa maong lugar gituohang aksidente kining natapigas ilabi na kay ngitngit usab niadtong higayona hinungdan sa iyang pagkatagak sa ubos nga bahin sa maong pangpang.
Matud ni PO3 Roland Camillo sa Minglanilla Police Station dihang nahinabi sa Banat News ang maong dalan daplin kaayo og pangpang tungod kay usa ka quarry site ang pikas bahin niini.
Ang kagawad sa barangay nga si Lining Resgonia mao nay mipahibalo sa kapolisan sa usa ka lalaki nga natagak sa pangpang ug sa pagresponde sa mga polis gisuwayan pa unta kini og dala sa Minglanilla District Hospital apan gideklarar kini sa mga doktor nga dead on arrival (DOA).