CCPO naka-100 percent sa IAD atol sa pre-AGI

Pagpangandam sa Cebu City Police Office sa pre-Annual General Inspections nga gihimo sa Regional Internal Affairs Service-7 diha sa Camp Sotero Cabahug nakakuha og maayong reaksyon gikan sa mga inspectors.

Kini ilabi na dihang gihimo sa seven-man patrol team nga mga sakop sa Security Service Group nga gipanguluhan ni Sr.Insp. Sarajane Recla ang Immediate Action Drill nga mipahigayon og scenario sa foot patrol ug kalit nga gi-ambush.

“Ok this is 100 percent. Pero in the national AGI this should be maintained sir,” kini maoy migawas nga reaksyon gikan kang Sr. Insp. Crisanto Duque ngadto kang Sr. Supt. Patrocinio Comendador.

Si Duque maoy usa sa mga inspectors sa RIAS-7 nga mihimo sa inspeksyon kagahapon. Ang SSG maoy dunay hurisdiksyon sa mga bukirong barangay sa dakbayan batok sa insurhensya ug seguridad sa mga molupyo sa maong mga dapit.

Nasayran nga ang IAD wala maapil sa criteria alang sa mga police offices sa mga dagkong siyudad apan gumikan kay ang dakbayan sa Sugbu usa sa mga siyudad sa nasud nga dunay teritoryo hangtud sa bukid giapil kini sa inspection.

Kagahapon gihimo usab ang hostage taking scenario diin mipakita sa ilang kahanas sa negosasyon nga gipanguluhan ni Traffic Group chief, Chief Insp. Jonathan Abella nga miresulta sa pagkasikop sa mga hostage takers.

Gawas pa niini gisusi usab ang pamaagi sa CCPO sa pagpahigayon og random checkpoints, crisis management, arresting techniques, Scene of the Crime Operation ingon man ang rank inspections.

Sa rank inspection, dunay mga polis nga gikatahong di pa kumpleto sa ilang tickler kon notebook ug uban pang ginagmay'ng indibidwal nga kasaypanan nga dali rang makurihian.

Kagahapon sa hapon gihimo usab ang inspections sa matag police stations ug karong adlawa gikatakdang makumpleto kini. Magpaabot pa og pipila ka adlaw una pa ipahibalo ang grado sa mga police offices ug units sa RIAS-7 human makumpleto ang inspeksyon sa tibuok ginsakupan sa Police Regional Office-7.

Kahinumduman nga ang CCPO maoy nakakuha sa unang pwesto sa milabay'ng tuig batok sa ubang police offices sa rehiyon. Ang PRO-7 ug ginsakupan nangandam na usab alang sa AGI karong sunod buwan nga himuon sa taga Camp Crame.