Mga bayot nga boring panakpon

Naalarma karon ang Cebu City Anti-Indecency Board (CAIB) sa taho nga midagsang na ang gitawag og “gay prostitutes” sa dakbayan. Matud ni CAIB Chairman   Rene Josef Bullecer nga labing minos lima ka mga barangay sa siyudad ang giingong dunay daghang bayot nga nagbaligya usab sa ilang unod.

Kini naglakip sa barangay Mabolo, Carreta, Hipodromo, Capitol Site ug Barrio Luz nga gikatahong hugpaan sa mga bayot ilabi na panahon sa kagabhion.

Sumala ni Bullecer nga dakong hulga sa panglawas gawas nga dili madawat sa Kristohanong katilingban ang pagpakighilawas sa usa ka lalaki ngadto sa laing lalaki.

Gani, nagkanayon ang CAIB chairman nga mas delikado ang gay prostitutes itandi sa gitawag og “Karton Girls” diha sa North Reclamation Area.

Tungod niini, miingon si Bullecer nga ilang ipasusi ang maong report aron hiposon ang mga bayot nga maglatagaw panahon sa kagabhion diha sa nahisgutang mga barangay.

“Lisod kaayo na kay naa ra bay nag-ung-ong nga balaodnon nga Anti-Discrimination Act, samtang wala pa na mahingpit nga balaod, hiposon nato na silang tanan,” sumala ni Bullecer.

“Syaro og dili na sila motagam, tag-P200 na man ron ang multa sa vagrancy, kana ra man pud nga kaso atong mapasaka ani nila,” dugang pamahayag ni Bullecer.

Sa susamang kalambuan, usa ka sikat nga mahuyang kinsa usa usab ka radio personality   mikompirmar nga nagpadayon karon ang gay prostitution sa dakbayan.

Ang naila nga si Inday Bambina sa DyHP-RMN Cebu mitataw nga kaniadto pa siya nakadungog gikan sa iyang mga kaubang bayot nga mobaligya sa ilang kaugalingon.

“Naa koy makasugat panahon sa kagabhion nga sakop sa federasyon akong pangutan-on kun diin sila gikan, naa ba sila'y show, nagrampa no sila,”  sumala ni Bambina.

Pabor si Bambina sa plano sa CAIB nga sikopon ang mga bakla nga walay klarong tumong sa pagsuroy-suroy ilabi na panahon sa kagabhion.

“Gawas sa mga gay prostitutes, duna man poy mga bakla nga snatcher, mangingilad, unsa pa na diha, so, kinahanglan pud nga sila sitahon,” dugang asoy ni Bambina.