Talisay pirme gibaha

Problema sa baha sa mga residente sa dakbayan sa Talisay padayong wala masulbad ilabi na karong panahon sa ting-uwan.

Niadtong Biyernes misamot ang problema tungod sa pagbunok sa uwan ug nakamugna og grabeng kahuot sa trapiko diha sa barangay Linao gumikan kay taga hawak ang tubig baha.

Si Talisay City engineer Audie Bacasmas mibutyag sa Banat News nga ang nahisgutang baha nahitabo mga alas 8  sa gabii niadtong Biyernes ug mikabat ngadto sa duha ka oras ang pagkabalda sa trapiko tungod kay ang mga sakyanan dili man makaagi.

Gawas sa ordinaryong baha, nauban sa tubig ang mga bato ug balas gikan sa ibabaw ug hasta ang mga takob sa mga manhole nangaukab.

Gibutyag ni Bacasmas adunay gi-develop nga subdivision sa ibabaw'ng bahin sa lugar ug gituohang diha gikan ang midahiling yuta ug bato nga wala maatiman maong wala na mosubay ang tubig gikan sa bukid padulong sa Pinggan River.

Sa laing bahin, ang hepe sa City Planning Development Coordinator,  Christine Homez mibutyag nga ang developer sa subdivision   misaad ngadto sa dakbayan nga i-mentenar nila ang paglimpiyo sa pundohanan sa waste water sa subdivision nga gi-develop.