Drayber nasukong gisingil, gipusil

Kretikal ang kahimtang sa usa ka drayber sa habal-habal dihang napusilan kini kay nasuko dihang gisingil sa nautangan niya didto sa  barangay Ilihan, lungsod sa Tabugon kagahapon.

Ang biktima mao si Ronnie Layague, 25, minyo, taga Canluhangon, Tabuelan; samtang ang suspetsado mao si Dem Montealto, hingkod, taga Cantubaon, Tabuelan .

Matud ni PO2 Dino Caputol sa Tabogon Police Station nga  nahinabi sa Banat News  nga ang biktima ug ang suspetsado nga pulos nagdala og habal-habal nagkaabot diha sa eskina sa Ilihan sa lungsod sa Tabogon  samtang nagpaabot og pasahero.

Miingon si PO2 Caputol nga nakautang diay ang biktima ngadto sa suspetsado dihang napilde kini sa tong-its unya dihang gisingil, nasuko man hinuon.

Midugang si PO2 Caputol nga mipauli makadiyot sa ilang balay ang suspetsado nga nagpangusmo sa kapungot ug sa pagbalik niini may dala na nga armas de fuego nga wala hisayri ang kalibre ug didto giluthang dayon ang biktima.

Naigo ang biktima sa tuong abaga ug milapos ang bala sa iyang bukobuko hinungdan  nga nahilandig kini sa Vicente Sotto Memorial Medical Center sa dakbayan sa Sugbu sa kretikal nga kahimtang.

Hinuon ang suspetsado boluntaryo usab nga mitahan sa iyang kaugalingon sa kapolisan sa lungsod sa  Tabuelan ug human niini  gi-turn over kini ngadto sa kapolisan sa Tabogon  diin mahitabo ang krimen.

Matud ni PO2 Caputol nga karong adlawa gitakdang ipasaka nila ang kasong “frustrated homicide” batok sa suspetsado.