2 sikop sa CIDG

Duha ka gidudahang drug personalities ang nadakpan sa mga sakop sa Criminal Investigation and Detection Group-7 diha sa dalan Avocado sa barangay Mambaling niadtong milabay’ng gabii.

Ang nangadakpan giilang sila si Ramil Quitnos alyas Ramil Quiño, 38, ug Carlos Yunson, 37, residente gihapon sa maong lugar pinasikad sa search warrant nga giluwatan ni RTC Branch 17 judge Silvestre Maamo,Jr. tungod sa paglapas sa RA 9165.

Ang grupo sa CIDG-7 nga mironda gipanguluhan ni Chief Insp. Richard Caballero inabagan sa Mambaling Police Station human makadawat og impormasyon kabahin sa operasyon sa mga suspek diha sa maong dapit.

Ang duha nakuhaan og upat ka paketeng may sulod nga gidudahang shabu; mga kahimanan pag-repacking sa shabu; digital weighing scale, tulo ka cellphone; usa ka bundle sa plastic sachet nga gamiton sa pagpamutos sa maong drogas.

Matud pang Caballero level two na ang duha ka dinakpan apan ang duha kusganong mihimakak niini.

Ang operasyon gisaksihan sa mga tanod nga sila si Eustaquio Tamarra Jr. ug Rolando Edaño.