6-anyos nalatayan og multicab

Napiyapi ang dughan ug nabuak ang apapangig sa 6-anyos nga batang lalaki nga tinun-an sa kinder nga aksidenting nabanggaan og multicab ug nalatayan pa gyud sa ligid niini sa iyang pagkatumba atol sa iyang pagtabok sa karsada didto sa Sitio Guilaguila, barangay Bagalnga, lungsod sa Compostela alas 10:30 niadtong Miyerkules sa buntag.

Ang naligsan mao si Rianje Bangalando Noya, 6 anyos nga tinun-an sa kinder sa Bagalnga Elementary School sa nahisgutang lungsod.

Samtang ang drayber sa multicab nga dunay plaka nga YDP907 nga maoy nakaligis kaniya mao si Carlito Laag Bugtai, 58, minyo ug molupyo sa barangay Mulao Campos sakop sa maong lungsod.

Matud ni SPO1 Celas Ceballo sa traffic section sa Compostela Police Station dihang nahinabi sa Banat News gikan nga migawas sa klase ang biktima ug paingon na unta kining mopauli kauban sa laing mga bata sa dihang nagduwa-duwa og nagdagan sa karsada.

Ang drayber sa multicab nga si Bugtai mitug-an atol sa pagsukit- sukit sa kapolisan nga sa layo pa ang distansiya nakabantay na siya sa unahan sa mga bata nga naggukodgukoray sa ilang paglakaw apan sa dihang diha na siya sa duol niini wala niya mabantayi nga kalit nga milabang sa karsada ang biktima nga si Rianje.

Atrasawo na nga naka-aplay og break ang maong sakyanan ug nabanggaan gyud niini ang biktima ug naparok ang nawong niini sa dulong una pa matumba ug tungod kay nagdagan pa ang multicab niadtong tungora napasok kini sa ilawom ug miaksyon og babag ang lawas hinungdan nga nalatayan pa gyud ang dughan niini sa kinaulahiang ligid.

Gisuwayan pa unta pagdala sa maong drayber sa Danao District Hospital ang biktima apan gideklarar kini nga dead on arrival ni  Dr.   Jose Maglasang.

Samtang ang drayber sa multicab boluntaryong mitahan sa iyang kaugalingon sa kapolisan ug nagpaabot sa tukmang kaso nga ipasaka batok kaniya.