Sugbu di kalikay sa daghang dropout

Wala makalihay ang dakbayan sa Sugbu sa nagkadaghang mga tinun-an sa nasud nga wala na mopadayon sa pagtungha.

Kini maoy giangkon ni City Hall Education Consultant Joy Augustus Young taliwa sa mga programa nga gipatuman sa Department of Education (DepEd) ug sa kagamhanan sa dakbayan.

Base sa report nga gipagawas sa National Statistical Coordination Board nga usa sa matag unom ka mga tinun-an sa nasud ang wala na mopadayon sa ilang pagtungha sa miaging tuig.

Matud ni Young nga dili na ikahibulong ang nahisgutang “dropout rate” tungod usab sa kalisod nga nasinati sa katawhang Pilipino.

Gani kini gikahadlokan sa ubang opisyal sa kagamhanan nga mosaka pa niining tuiga tungod usab sa nagpadayong pagsaka sa presyo sa mga palaliton.

Gitataw hinoon sa education consultant nga padayon nilang gihingusgan ang ilang mga programa ilabi na ang pagpalig-on sa pundasyon sa mga tinun-an.

Kini sama sa pagtudlo sa mga tinun-an sa gikinahanglan ug sa angayang makat-unan niini diha sa tunghaan partikular na sa elementarya.

“Ato man gong nakita nga kung maayo ang foundation sa tinun-an mas less ang chance nga mo-drop out ang bata,” sumala ni Young.

Apan taliwa sa ilang paningkamot giangkon ni Young nga kini dili makasulbad sa tanang gikinahanglan sa tinun-an, hinungdan nga ang uban mapugos paghunong sa ilang pagtuon.

Nasayran hinoon nga ang siyudad misugod na usab pagpatuman sa Alternative Learning System kon ALS sa kabarangayan sa dakbayan.

Pinaagi sa maong programa, mahimo gihapong makaeskwela ang mga tinun-an ug makakuha og diploma nga wala na kinahanglana ang pag-adto sa tunghaan.

Matud sa chairman sa Committee on Education sa City Council nga si Konsehal Gerry Carillo, walay limit sa edad ug walay bayad ang magpa-enroll sa ALS.

Midugang si Carillo nga kadtong interesado sa nahisgutang programa mahimong moduaw sa iyang buhatan alang sa dugang kasayuran.