Jakosalem: Ipa-‘drug test’ gyud ang molukat og lisensya sa drayber

Dili pabor si Cebu City Councilor Jack Jakosalem sa sugyot nga dili na ipa-“drug test” ang molukat og lisensya sa pagkadrayber.

Matud ni Jakosalem nga epektibo ang balaod nga nagmando niini ug dili angayang usbon ug wagtangon ang pagpa-drug test nila.

Ang konsehal nga maoy chairman sa Committee on Transportation sa konseho ning dakbayan mipasabot nga mapugos gyud paghunong sa iyang bisyo ang usa ka tawo kun gusto nga makabaton og lisensya.

Ang abogado sa administrasyon  nga si Attorney Romulo Macalintal maoy misugyot ngadto kang Tsirman Tito Sotto III sa Dangerous Drugs Board (DDB)  nga patun-an ang iyang sugyot nga wagtangon na ang panginahanglang magpa-drug test ang usa ka tawong mokuha og lisensya sa pagkadrayber.

Kini human usab mopadayag si Sotto sa iyang tinguha nga maamindahan ang Akta Republika 9165 kon ang Comprehensive Dangerous Drugs Act of 2002.

Matud pa ni Macalintal nga usa ka pag-usik-usik sa kuwarta sa aplikante og lisensya sa pagkadrayber ang pagbayad sa drug test.

Ang pribadong mga sentro sa drug test  nga naa sa palibot sa mga buhatan sa Land Transportation Office (LTO) giingong mangayo og P300 ngadto sa P350 nga bayad sa magpa-drug test.