Usa ka 21- anyos nga mag-uuma gitigbas patay ginamit ang sanggot ingon man gidakdakan og bato ang ulo sa manag-agaw nga silingan niadtong Lunes sa alas 3:30 sa hapon didto sa Sitio Mangadlaw barangay Cabalawan, lungsod sa Sogod.
Ang namatay giila sa kapolisan nga si Anecito Modequillo Talingting, 21, ulitawo kinsa nakaangkon og samad tinigbasan sa dughan, tiyan, bukton, ulo.
Samtang ang mga nakatigbas mao ang iyang silingan nga sila si Renante Bregente Andales, 24 ug Christom Bregente Rivera, 21.
Si SPO3 Joe Miller Baticuang nga nahinabi sa Banat News nagkanayon nga si Talingting maoy miuna sa pagtigbas ngadto sa mga suspetsado dihang gisundan kini.
Matud pa ni Baticuang padulong nga manguha’g kumpay si Talingting nga ilawog sa mga hayop niadtong tungora sa dihang dunay nakasulti nga mopalayo siya sa dapit kay medyo lain og tuyo ang magsuong Andales.
Kini tungod usab kay ang managsilingang barkada niadto adunay karaang panagbangi apan niadtong tungura nahisgutan sa mga Andales sa dihang nahubog kini nga adunay dautang tuyo ngadto kang Talingting.
Sa dihang misunod ang magsuon gipaabot kini sa biktima, diha-diha gilayon gitigbas sa dalang sanggot si Renante hinungdan nga maayong pagkaigo sa ulo nga nasiak kini, kilid sa lawas ingon man nagkawilkwil ang walang dunggan ug delikado ang kahimtang.
Si Christom kinsa mitabang sa iyang ig-agaw maoy giwiktan sa sanggot hinungdan nga naigo sa iyang ulo ug bukton.
Apan bisan kun mga samaron ang magsuon, si Christom nakamaneho sa paggakos sa biktima hinungdan nga nailog ni Renante ang sanggot ug gitigbas usab kini.
Human mahagba sa yuta si Talingting gitiwasan kini ni Christom pinaagi sa pagdakdak sa dakong bato sa ulo hinungdan sa pagkapusa niini.
“Sakto gyud kaayo ang gidak-on sa samad sa ulo nga gidakdakan og bato masulod ang usa ka palad sa tawo,” sumala pa ni SPO3 Baticuang.
Dugang pa niini nga naka-inom gyud ang duha ka magsuon atol sa maong pagpatay sa biktima.
Ang duha kinsa boluntaryong mitahan sa kapolisan sa nahisgutang lungsod nagpaalim na karon sa tambalanan dinhi sa dakbayan.
Samtang matud pa ni SPO2 Baticuang nga kasong Homicide ang ipasaka batok sa magsuon human usab ang amahan sa biktima nga si Diosdado Talingting mipadayag sa pagkiha kagahapon didto sa ilang presinto.