Spa gitulis sa 7 ka batan-on

Pito ka mga batan-on mitulis sa usa ka spa diha sa dalan Osmeña Blvd. dili layo sa Police Regional Office-7 ug gihimulbulan ang maong establisamento sa ilang mga gamit lakip na kinitaan kagahapon sa kaadlawon.

Ang gitulis mao ang Aviary Health Spa nga gipanag-iya ni Mark Anthony So ug gibantayan niadtong tungura ni Ramil Cañete kinsa maoy nanirado sa maong tindahan niadtong tungura.

Si Supt. Henry Biñas, hepe sa Fuente Police Station sa pakighinabi sa Banat News nagkanayon nga mao pay pagsirado ni Cañete sa gitrabahoan niadtong tungura dihang kalit kining giduol sa pito ka wala mailhing mga batan-on.

Ang mga tulisan gibana-banang nagpangidaron pa og 16-anyos ngadto sa 19-anyos usa kanila gikatahong mition og armas kang Cañete dayong deklarar og tulis.

Sumala pa sa report  nangita sa yawe sa establisamento ang tulisan diha kang Cañete ug pugsanong giablihan ang spa ug diha-diha gisugdan og panguha ang ilang computer set gawas lang sa keyboard diha sa desk, giablihan ang drawers ug gikuha ang halin nga P12mil; gikuha usab ang mga wall clocks sa mga cubicle, cellphone sa kumpanya ug ang kang Cañete ug pitaka niining may sulod nga P2,000.

Human sa hitabo daling miikyas ang mga suspek sa wala matinong direksyon apan gikatahong nanakay sila og taxi. Walay nailhan si Cañete sa gipakitang mga hulagway sa mga notadong tulisan diha sa maong lugar.

Si Biñas nagkanayon nga ila nang gisusi karon ang posibilidad nga mga batan-ong taga barangay Sambag Uno ra ang mga tulisan ug mga miyembro og mga gangs nga walay lingaw niadtong tungura ug gustong makakwarta  apan matag kaadlawon ra mogawas.

Samtang si Sr. Insp. Michael Anthony Bastes sa Theft and Robbery Section mitug-an sa Banat News sama kang Biñas nagtuo usab nga mga gang members ang grupo nga posibleng gikulangan para sa ilang bisyo.