Retiradong sakop sa US Army gituohang gitulis sa wala mailhing mga tawo sa wala pa kini gipatay. Wala na kini kinabuhi nga napalgan sulod sa giabangan niyang balay sa sitio Cagudoy, barangay Basak, Lapulapu kagahapon sa buntag.
Si Billie Thomas Hannon, 70, lumad nga taga Texas, USA, nga usa ka retiradong Army ug kasamtangang nagpuyo sa giabangan niining balay nga iya sa usa ka Fil Amodia nga nahimutang sa maong dapit. Wala mahibaw-i sa kapolisan ang ranggo ni Hannon sa US Army.
Sa pasiunang imbestigasyon ni SPO2 Rolito Jumao-as sa Homicide Section sa Lapulapu nga gisubay nila karon ang anggulo sa panulis tungod kay nangawagtang ang mga personal nga kagamitan sa retiradong sundalo nga si Hannon.
Ang mga nangawagtang nga kagamitan ni Hannon mao ang pitaka, cellphone ug bulawan nga singsing nga adunay diamante.
Si SPO2 Jumao-as nagkanayon nga ang patay’ng lawas ni Hannon nakaplagan sa usa ka Gregoria Ompad Estardo, 73, nga residente sa maong dapit.
Si Estardo mitug-an ngadto sa mga imbestigador nga nabatasan na niya nga motimbaya sa Amerikano matag higayon nga makaagi kini sa iyang gipuy-an.
Sumala pa ni SPO2 Jumao-as nga sa dihang nahiagi si Estardo sa panimalay ni Hannon kagahapon sa alas 6:30 sa buntag, wala motubag sa iyang pagtimbaya ang Amerikano hinungdan nga iya kining gilili pinaagi sa screen sa pultahan.
Nakita ni Estardo ang Amerikano nga gigapos ug gibaatan ang ilong ug baba hinungdan nga nangayo siya og panabang sa mga silingan.
Sa pagresponde sa grupo ni SPO2 Jumao-as, nakita nila ang wire sa electric fan nga maoy gigamit paggapos sa Amerikano nga nagbinaklid, samtang ang baba ug ilong gibaatan og tualya hinungdan nga wala kini makaginhawa ug maoy gituohan sa mga imbestigador nga maoy hinungdan sa iyang kamatayon.
Matud pa ni SPO2 Jumao-as nga sobra sa duha ka tawo ang mipatay kang Hannon gumikan sa kadako niini nga malisud sa usa lamang ka tawo.
Nagduda kini nga kaila ra sa Amerikanong si Hannon ang mitulis ug mipatay niini gumikan kay walay nakitang mga senyalis sa pinugos nga pagsulod sa giabangan niining balay.
Si Cristina Sasan nga usa pa lamang ka bulan nga gikapuyo ni Hannon mipadayag nga iyang gibulagan si Hannon niadtong Hulyo 5 ning tuiga gumikan kay dili niya maantos ang batasan niini.
Matud ni Sasan nga wala siya makadawat og pagmaltrato sa Amerikanong kanhi sundalo apan makadaghan na siya pakaulawi niini atubangan sa daghang tawo gumikan kay isog kini ug kusog mamalikas kun makasakay na sa iyang sakyanan sa higayon nga adunay makababag kaniya ug malangay ang lakaw niini.
Sumala pa ni Sasan nga maka-upat na ka higayon silang nagbalhinbalhin og puyo gumikan kay kusog mangasaba si Hannon sa mga estambay nga magsabasaba.
Gitataw hinuon niya nga wala na silay komunikasyon sa Amerikanong kanhi sundalo human sa ilang panagbulag.