7 ka banggiitang mangunguot sikop

Pito ka mga gipasanginlang banggiitang mangunguot ug manimpuhay dinhi sa dakbayan ang nangadakpan sa managlahing operasyon sa kapolisan sukad niadtong Sabado sa buntag hangtud kagahapon sa buntag.

Ang gidakop kaganihang buntag mao si Junard Galendo, 20, nga taga barangay Kalunasan human kini masigpati ni SPO2 Geffrey Diola sa Theft and Robbery Section sa ground floor sa usa ka department store sa eskina sa dalan Colon ug Leon Kilat.

Si Galendo gikatahong notado nga mangunguot sumala pa sa kapolisan apan kini kusganong mihimakak sa pasangil ug nangangkong igo ra siyang mipalit og sinina sa maong tindahan dihang kalit siyang giagbayan ni Diola ug giposasan.

Matud pa niya nga wala siya masayod kung unsa ang iyang sala apan si Diola nagkanayon nga kadudahan  nang daan  ang lihok niini ug dihang nakit-an siya niini diha sa dalan Colon kalit kining midagan ug misulod sa maong department store.

Si Galendo gikatahong misuway pa og haylo og P2,100 diha sa iyang bulsa kang Diola aron kini pabuhian apan gidala siya sa maong polis sa buhatan sa TRS.

Samtang sa laing bahin nadakpan usab sila si Gerry Abayan, 38, nga taga dalan Spoliarium sa barangay Duljo-Fatima human kini masigpati sa TRS diha sa usa gihapon ka dakong mall sa dalan N. Bacalso Ave.

Si Abayan miangkong matag Sabado ug Domingo mo-sideline kining manguot apan manindahay gyud siya og sud-an sa ilang dapit.

Laing nadakpan mao sila si Gerry Cañete,37, ug Rolando Secretaria, 40, kinsa notado na gihapong mangunguot, esnatser ug tulisan nga nagpuyo sa barangay Ermita kinsa nadakpan niadtong Sabado sa buntag diha sa dalan Gochan.

Si Secretaria miangkong sulod-gawas na sa bilanggoan tungod sa nagkalain-laing mga kaso sa pagpanulis, kawat, snatching ug drogas. Sa iyang nadumduman nasulod usab siya sa Davao Penal Colony niadtong 2005 ug nakabalik dinhi ning bag-uhay palang.

Nadakpan na usab siya kaniadto ni hepe sa TRS nga si Sr. Insp. Michael Anthony Bastes niadtong tuig 1996 dihang ang modus operandi niini mao ang pagpanglabni samtang magsakay og bisekleta.

Laing nadakpan mao sila si Rowena Villanueva, 32,nga taga Unit 5 Opra sa barangay Kalunasan ug Roldan Quijano,20, taga sitio Tuburan sa barangay Labangon nga parehong nadakpan diha sa eskina sa Sanciangko ug Leon Kilat niadtong Sabado sa buntag.

Ang duha parehong miyembro sa ‘tirtir’ kun mangunguot nga magkumboya paglipat-lipat sa ilang biktimahon, mihimakak hinuon ang duha sa pasangil kanila ug nangangkong igo ra silang nanuroy  niadtong tungura.

Samtang ang laing nadakpan mao si Fe Mabanto, 49, taga Quiot-Pardo kinsa nadakpan gihapon diha sa dalan Urgelio sa Sambag Uno niadtong Sabado human mosulod sa usa ka panimalay.

Si Mabanto miangkong natintal gyud siya og sulod sa maong balay tungod sa nakit-ang cellphone nga nagpatong diha sa lamesa apan gumikan kay dili gyud siya hanas niini igo ra siyang nagsulod-gawas sa balay nga wala gyud niya punita ang cellphone hangtud nga siya nasigpatan sa usa ka tiguwang babaye ug siya gikuptan ug gipadakop sa mga tanod.

Hinuon wala siya kasuhi sa tagbalay ug igo ra siyang gipapirma diha sa barangay hall apan gikatahong mitawag sa TRS ang mga tanod ug siya gidala diha sa ilang buhatan ug gipatan-aw sa ubang mga nabiktima sa “tiyempo” hangtud nga may usa ka katabang nga nakamay-ong kaniya.

Matud pa niya dili tinuod ang alegasyon sa maong katabang ug tumo-tumo ra kini.