Dako ang kahigayonan nga mahingpit na nga lone congressional district ang dakbayan sa Lapulapu ug mag-una pa kini sa dakbayan sa Mandaue bisan pa sa naghinubra na nga kwalipikasyon sa mga nagpuyo niining residente.
Si Kongresista Nerissa Soon-Ruiz nga maoy nagduso sa House Bill 1306 nga miingon nga mahingpit na nga mahimong lone congressional district ang dakbayan sa Lapulapu nga mag-una pa sa dakbayan sa Mandaue.
Matud pa niya nga ang House Bill 1306 ang pagatukion na sa committee level sa kongreso ug dako iyang pagtuo nga dili kini makasugat og kakulian.
Si Soon-Ruiz miingon nga dako iyang pagtuo nga dili makasinati og kakulian ang HB 1306 sanglit ang sagad sa iyang mga kaubang kongresista dili manginlabot sa iduso nga balaudnon nga nag-epekto sa lokal nga kagamhanan.
Sa nasayran nga ang tinguha nga paghimong lone congressional distrct sa dakbayan sa Mandaue natigayon sa tuig 2001 sa panahon pa ni kanhi Kongresista Efren Herrera.
Si Herrera nga konsehal karon sa dakbayan sa Lapulapu napakyas sa paghatag og katumanan sanglit igo lamang kining nakalabang sa Ubos Balay Balaoranan.
Nakasugat kini og mga kakulian sa pagduso na ngadto sa senado hangtod nga naabtan sa pagkapupos sa termino ni Herrera.