Naghikog human patya ang uyab

Tungod lang sa selos gidunggab patay sa usa ka batan-ong lalaki ang iyang hinigugma nga kauban ra usab sa trabaho ug pagkahuman nagpakamatay usab kini pinaagi sa pag-inom og thinner sa barangay Yati lungsod sa Lilo-an niadtong Biyernes sa alas 8:15 sa buntag.

Ang biktima giila sa kapulisan nga si Jean Benideqi, 21, dalaga ug lumad nga taga Kawit, Medillen apan stay-in sa kasamtangan niining gitrabahoan sa Euro Star Marketing nga usa ka hardware nga nahimutang sa maong lugar.

Samtang ang suspek nga iyaha ra usab nga hinigugma ug nagpakamatay usab giilang si Renato Talarion Fuentes, 26, lumad nga taga Magsaysay siyudad sa Toledo ug helper ra usab sa maong establisamento.

Matud ni SPO1 Claudio Castro sa Lilo-an Police dihang nahinabi sa Banat News nagselos ang suspek tungod kay dunay laing nangulitawo  sa iyang hinigugma, tungod sa kasuko niini iya kining gidunggab.

Ang biktima nga nakaangkon og samad dinunggaban sa tiyan gidala unta sa Don Vicente Sotto Memorial Hospital apan gideklarar nga Dead on Arrival (DOA).

Samtang ang suspek pagkahuman sa hitabo miinom usab kini og thinner ug mao na usab ang gitabang sa mga kaubang trabahante ug gidala sa nahisgutang tambalanan apan namatay gyud kini  mga alas 11:15 sa milabay ’ng gabii.