Kolektor sa cargo forwarder gibanhigan sa 2 nagmotor

Patay ang usa ka kolektor sa usa ka cargo forwarder diha sa Gov. Cuenco Ave. sa sitio Nasipit barangay Talamban human kini sikiti og gipusil sa duha ka lalaking nagsakay og motorsiklo niadtong milabay’ng gabii.

Kining maong insidente maoy ikatulong pagpamusil patay niadtong adlaw’ng Biyernes nga diin pulos nagmotorsiklo ang mga mamumuno.

Giila ni SPO1 Audie Pelayo sa Homicide Section sa pakighinabi sa Banat News ang biktima mao si Buddy Denapo, 31, residente sa sitio Kapakulan sa barangay Tisa.

Si Denapo nagtrabaho isip mensahero ug kolektor sa 2Go Cargo Forwarder nga may franchise diha sa Banilad ug gipanag-iya sa usa ka Jude Chan.

Duha ka wala mailhing tawo nga sakay og usa ka kolor yellow, itom ug pula nga motorsiklo ang gikatahong mipatay sa biktima diin ang backrider maoy gitumbok nga gunman.

Sumala pang Pelayo ang biktima nagmaneho sa iyang puti nga multicab padulong sa Talamban Proper ug gituohang padulong sa ilang opisina aron i-park sa ilang garahian ang sakyanan dihang nahitabo ang pagpamanhig.

Gikatahong samtang nagmaneho si Denapo sa multicab kalit nga miabay diha sa iyang tupad ang mga mamumuno ug ang backrider mipusil kaniya makausa hinungdan nga nahunong ang sakyanan.

Diha-diha mihunong ang mga suspek sa atubangan sa multicab ug mikanaog ang backrider ug gitiwasan pagpusil si Denapo. Si Denapo naigo diha sa tuong mata ug ulo nga nakaingon sa hinanali niining kamatayon.

Ang sakop sa Emergency Rescue Unit Foundation nga si Gerry Mercado nga maoy miresponde sa dapit wala na makakita og senyales nga buhi pa si Denapo nga niadtong tungura nag-ubo na sa manobela.

Samtang gisalikway sa kapolisan nga tulis ang motibo sa pagpamanhig sanglit gikatahong naa pa diha ang dakong kantidad sa iyang posesyon ug wala kuhaa sa mga mamumuno.

Sa pagkakaron wala pay matumbok nga motibo ang kapolisan sa pagpamusil ingon man kung si kinsa ang mga suspek, walay nakuhang empty shell sa mga bala gawas lang sa usa ka deformed slug diha sa crime scene.

Sayo nianang adlawa, usa ka technician og piano nga tag-iya usab sa iyang piano repair shop nga si Norbert Sumicad sa eskina sa dakan Katipunan ug T. Masong private road ang gipatay sa duha ka nagmotorsiklong wala mailhing lalaki.

Ang motorsiklo gihulagway nga may pagkapareho ang kolor namanhig kang Denapo, wala usab nakuhang basiyo sa bala gawas lang sa usa ka deformed slug.

Apan wala hinuon matino kung pareho ra ang mga mamumuno sa duha. Nianang pagkahapon usab sa samang adlaw usa ka Tomas Carbonilla ang gipatay sa nagmotorsiklo gihapong kalalakin-an diha sa Villagonzalo II sa Tejero. Duha ka basiyo sa kalibre 45 ang nakuha diha sa crime scene .