Kampanya vs. drugas sa barangay pakusgan

Subling palig-unon ang Barangay Anti-Drug Abuse Council (BADAC) sa nagkadaiyang kabarangayan sa dakbayan sa Sugbu.

Kini maoy gibutyag sa labaw sa Cebu Office for Substance Abuse Prevention (COSAP), Jose Felix Lazarte, nga sakop usab sa City Anti-Drug Abuse Council (CADAC).

Gipasabot ni Lazarte nga kapin sa 50 porsiyento sa mga kapitan sa siyudad ang mga bag-o ug kasagaran niini giingong wala masayod kung unsa ang Badac.

Nasayran usab ni Lazarte nga ubay-ubay sa mga kapitan nga mga naa na sa ikatulong term gawas sa nangapilde sa miaging eleksyon ang wala usab formal nga miturn-over sa maong buhatan.

Kini ang hinungdan nga nakahukom ang Cadac nga subling palig-onon ang Badac sa 80 ka mga barangay sa siyudad.

“Mas daghan man gud ning mga bag-o lang napili ba, mga first timer, mao nga naka-decide ang Cadac nga ato ni silang i-orient ug i-organize. Gusto sa Cadac nga i-activate sa tagsa-tagsa ka barangay ang Badac pero ato unang i-orient ang mga kapitan kung unsa ang composition ug function ani niya,” dugang ni Lazarte.

Miingon si Lazarte nga unahon nila pagre-organize ang Badac sa mga barangay nga ubos sa Mabolo Police Station 4.

Ang nahisgutang police station dunay walo ka mga barangay nga ubos sa Area of Responsibility niini sama sa Barrio Luz, Mabolo, Banilad, Lahug, Busay, Hipodromo ug uban pa.

Nagkanayon si Lazarte nga ang orientation ug reorganization gitakdang himuon karong Huwebes sa sunod semana diha sa Barrio Luz.

Human niini miingon si Lazarte nga ipahigayon usab ang pagpapanumpa sa mga barangay kapitan isip chairman sa Badac sa ilang barangay.

Gitataw ni Lazarte nga gikinahanglan nga maestablisar ang Badac diha sa kabarangayan aron mapalig-on pa ang kampanya sa siyudad batok sa ginadiling drugas.