Magtiayon gikawatan

Bakasyunistang Amerikano ug asawa niining Pinay nabiktima sa pagpanglungkab ug nakuhaan og mokabat sa 70 mil pesos nga salapi ug duha ka mahalong cellphone diha sa sitio Alanagasil, barangay Madridejos lungsod sa Alegria niadtong Huwebes sa alas 11:30 sa udto.

Ang mga biktima giila sa kapulisan nga si Max Koehn, 51, taga Oklahoma, U.S.A ug asawang si Marilyn Koehn, 42, lumad nga taga Pulangtubig, Abelgas Comp. 2 Dumaguete City, Negros Oriental.

Ang magtiayon mibakasyon ug mipuyo diha sa panimalay sa usa ka Virginia Durango apan sa ilang pagmata namatikdan nila nga nahanaw na ang ilang bag nga maoy gisudlan sa kwarta ug cellphone.

Sila si Insp. Patrocinio Baylosis Jr., hepe sa Alegria Police ug mga sakop nagkanayon nga giguba na ang kandado sa pultahan sa kusina sa maong pinuy-anan samtang nangatulog pa ang namuyo.