100 ka pamilya demolison sa Lahug

Nabulabog ang dul-an sa usa ka gatos ka mga pamilya nga namuyo sa Sugbu Homes diha sa barangay Lahug ning dakbayan sa Sugbu human padalhi og seven-day notice sa Squatters Prevention Encroachment and Elimination Division (SPEED) nga sila demolison.

Partikular na niini ang mga molupyo nga mga sakop sa 1321 Homeowners Association ug Veterans Homeowners Association diha sa maong dapit.

Moabot sa 97 ka household members ang nahatagan og notisya aron boluntaryong mopahawa sa ilang nahimutangan ug hangtud karong Huwebes nalang sila diha sa maong dapit.

Butang nga dili madawat sa kadaghanan sa mga molupyo tungod kay giingong taud-taud na silang nagpuyo diha sa maong dapit.

Ang apektadong mga pamilya dali nga midangop kang Lahug Barangay Captain Mary Ann delos Santos alang sa pagpangayo niini og tabang.

Gipasalig hinuon sa kapitan ang pagsuporta sa iyang mga konstituwente ug miuban sa panawagan ngadto sa kagamhanan sa dakbayan nga irekunsiderar ang plano niini.

Matod ni delos Santos nga gusto sa apektadong mga molupyo nga data-datahan na lang ang giukupahan niining mga luna.

Alang sa kapitan, ang pagpaminaw sa sentimento sa iyang mga konstituwente mao ang labing maayong paagi pagsulbad sa maong problema.

“The best solution there is the actual occupants should be given the first refusal to buy the land kay gipanag-iya man kaha na sa siyudad,” sumala ni delos Santos.

Midugang ang kapitan nga dili mahimong sayon-sayunon na lang pagpapahawa ang mga molupyo kung walay ikahatag nga relocation site niini ang dakbayan.

“They have to look for a relocation site for our people, they just can’t demolish like animals nga ila lang ilabay, naa gyud nay relocation site, that is mandated by law,” matud ni delos Santos.

Ang Local Housing Board mirekomendar pag-demolish sa maong mga panimalay basi usab sa resulta sa gihimong imbestigasyon sa Department for the Welfare of the Urban Poor (DWUP) kay giingong ilegal nga gitukod ang kabalayan sa bakanteng luna diha sa Sugbu Homes base usab sa subdivision plan data.
Apan karon pa lang giingong nagplano na ang apektadong mga molupyo  nga  sulungon ang City Hall aron ipadayag ang ilang mga sentimento ngadto sa hingtungdang mga opisyal