Lapulapu nangiwit sa NAT

Nangiwit karon ang Lapulapu City Schools Division dinhi sa rehiyon siyete sa gipahigayong National Achievement Test sa sayong bahin niining tuiga.

Ang Lapulapu maoy nakakuha sa labing ubos nga rating sa grade 6 ingon man sa second year gikan sa 15 ka mga schools division sa tunga-tungang kabisay-an.

Sa pikas bahin, gipasigarbo usab ni Cebu City Schools Division Superintendent  Lorna Rances ang resulta sa nakalabay nga NAT exam.

Kini tungod kay ang Cebu City Schools Division nahimutang na sa ikatulo nga dapit sa rehiyon 7 sa grade 6 gikan sa ika-13 nga pwesto sa miaging tuig.

Matud ni Rances nga dako kaayo ang maong kausaban tungod kay ang Tabunan Elementary School maoy labing ubos og rating sa NAT exam sa miaging pipila ka tuig.

Samtang sa second year, ang Cebu City Schools Division nahamutang na usab karon sa ika-upat nga luna gikan sa ika-11 sa miaging tuig.

Wala na hinuon masurpresa si Rances sa maong resulta tungod usab sa ilang gihimo nga mga kausaban pagpalambo sa kahibawo sa mga magtutudlo ingon man sa mga tinun-an.

“Daghan man ta og gipanghimo gud, usa ini closer ang atong supervision sa mga teacher, unya ang atong mga tinun-an gisigihan gyud nato og review every Saturday, unya namili pud ta og mga maestra nga mo-review, kadtong the best teacher in the school mao to silay nag-conduct sa review,” sumala ni Rances.

Gawas niini, nasayran usab gikan kang Cebu City Hall Education Consultant Joy Augustus Young nga gi-upgrade usab sa siyudad ang teaching skills sa mga magtutudlo.

Partikular na niini ang mga magtutudlo sa Science, samtang gipaubos usab sa Suken certification program ang mga magtutudlo sa Math subject.

Nasayran hinuon nga nagsunod lang ang Cebu      City itandi sa Cebu Province sa miaging NAT exam dinhi sa rehiyon siyete.