Gun loan sa mga piskal aprobado sa NPLP

Ang mga sakop sa  National Prosecution Service sa tibuok nasud tabangan sa ilang organisasyon sa pag-angkon og armas pinaagi sa “gun loan” program nga usa sa mga benepisyong naaprobahan atol sa ilang National Prosecutors League of the Philippines (NPLP) nga gipahigayon didto sa Cagayan de Oro.

Nasayran gikan kang Cebu City Assistant Prosecutor Mary Ann Castro nga matag piskal mahimong maka-loan og armas sa kantidad nga P30 mil nga datahan sa 8 porsiyentong interes. Si Castro maoy mirepresentar sa Sugbu sa maong tigum.

Matud ni Castro nga ang armas dako og matabang sa pagprotehir sa mga piskal tungod sa klase sa ilang trabaho.

Giuyonan usab ang health care benefits sa mga piskal nga adunay P3 milyones nga pundo alang sa problemang medikal.

Matag piskal, sumala pa ni Castro, mahimong mahatagan og Blue Cross Health Care card sa kantidad nga P300 matag bulan, apan makahimulos sa pagpatambal ug pagpa-admit sa bisan asang tambalanan sa nasud nga accredited sa Blue Cross.

Atol sa maong panagtigum, naaprobahan ang sugyot nga patas-an ang benepisyo sa mga miretirong mga piskal.

Si Prosecutor Edward Togonon sa Muntinlupa nga maoy presidente sa NPLP, miaprobar nga ang city prosecutors makadawat og susamang benepisyo sa usa ka huwes sa Court of Appeals, samtang ang assistant city prosecutors makadawat og benepisyo sa usa ka huwes sa Regional Trial Court. Matag city prosecutor adunay 25 ka assistant city prosecutors.

Si Castro nagkanayon nga tungod sa maong kalambuan, gipaabot nga daghan na unyang mga abogado nga mosulod sa National Prosecution Service.