Pamaligya sa makinang sinakmit ipa-imbestigar

Nasurpresa si Mayor Tomas Osmeña sa taho nga gipamaligya sa Cebu City Bantay Dagat Commission (CCBDC) ang pipila ka mga makina nga sinakmit.

Ang mayor wala masayod sa gihimong lakang sa CCBDC ug wala usab pahibaw-a sa project director niini nga si retired Colonel Cesar Enriquez.

Tungod niini ipaimbestigar ni Osmeña ang CCBDC tungod kay giingong wala itugot ang pagbaligya sa mga butang nga ilang nasakmit.

“It is not allowed, we have our investigators looking to that,” sumala sa mayor nga namula ang nawong dihang nasayod sa maong report.

Gipahibawo usab ni Osmeña nga sukad sa paghupot ni Enriquez sa CCBDC wala kini makasumiter bisan usa ka accomplishment report.

Tungod niini walay kasayuran ang mayor kun unsa na ang gipanghimo ni Enriquez ingon man sa iyang mga ginsakupan sa CCBDC.

Si Enriquez maoy mihulip pagdumala sa Bantay Dagat human pusila-patay ang project director niini nga si Elpidio “Jojo” dela Victoria  Jr. pipila ka tuig na ang nakalabay.

Gikataho nga labing minos duha ka makina nga giingong nasakmit sa CCBDC sa panahon pa ni dela Victoria ang gipamaligya  ni Enriquez.

Kini base usab sa kopya sa blotter diha sa buhatan sa CCBDC penitsahan og Mayo 8 niining tuiga nga gipadangat sa Banat News.

Kini gikonpirmar mismo sa usa ka sakop sa CCBDC nga si Leonardo Bariñan diin ang halin niini giingong gigasto usab sa ilang operasyon.

Una nang nasurpresa ang labaw sa General Services Office (GSO) sa Cebu City Hall nga si Ester Cubero sa gihimo sa mga sakop ni Enriquez.