Tulo ka tulisan nga nagtaptap sa nawong nga sakay og motorsiklo midagit sa kapin P30 mil nga koleksiyon sa usa ka kolektor sa Cebu Caritas Incorporated niadtong alas 12:10 sa hapon didto sa Sitio Lunas 1 barangay Kadaruhan, lungsud sa Borbon niadtong Martes.
Si SPO2 Mori Magdadaro sa Borbon Police Station miila sa biktima nga si Myra Villegas, 25, community development officer ug collector sa Caritas.
Matud pa ni SPO2 Magdadaro nga gikan mipahigayon og meeting si Villegas sa ilang mga miyembro sa nahisgutang lugar sa dihang paingon unta kini sa Sitio Lunas 2.
Uban ang ilang drayber dihang gibabagan ang dalan sa tulo ka mga tawo nga nagmotorsiklo dayon deklarar og tulis diin ang usa maoy mition og 38 kalibreng pistola ug gikuha ang iyang bag nga adunay sulod nga P33, 393.00.
Human sa maong pagpanulis dali usab nga misibat ang mga akusado sakay sa motorsiklo.