Oil deregulation law ibasura–CBCP

Gisuportahan sa Catholic Bishops Conference of the Philippines (CBCP) ang isyu kabahin sa  pagbasura sa Oil Deregulation Law (ODL) nga usa usab sa gipangayo sa grupo nga Nagkahiusang Drayber sa Sugbo (NADSU).

Ang pagbasura sa ODL  ug ang unipormadong  plitehan sa tibook nasud maoy mga isyu nga gisakyan sa  NADSU hinungdan  nga miisog sila sa ilang welga sa miaging semana.

Ang presidente sa   CBCP nga si Arsobispo Angel Lagdameo sa Jaro, Iloilo,  mipadayag nga gikinahanglang wagtangon  gyud ang ODL lakip usab ang value added tax (VAT) sa asayte aron makabangon ang katawhan sa hilabihang kalisod sa panginabuhi karon.

Matud pa ni Lagdameo nga kinahanglang usbon gayud karon ang sistema sa pagpadagan sa ekonomiya tungod kay matag higayong mosaka ang presyo sa mga palitonon ,ang unang maigo ug apektohan way lain kundi ang  mga kabus.

Matud pa ni Lagdameo nga panahon na karon nga ang kagamhanan maminaw  sa awhag sa mga kabus bahin sa tukmang pagpangita og maayong sistema ug ekonomikanhong pamaagi aron dili mosangpot sa pagkamakaluluoy ang mga kabus.

Matud pa ni Lagdameo nga sa wala pa ang balaod nga ODL, ang mga kompaniya sa lana mosang-at una og petisyon  ngadto sa Department of Energy (DOE) kun may laraw sila nga mopasaka sa presyo sa ilang produkto, lahi karon  nga nagpatuyang nalang sila sa pagpasaka sa presyo sa ilang  mga baligya nga wala nay pananghid sa gobyerno.