‘Karton girls’ sa recla tabanga’g sumpo sa CAIB
Manginlabot na ang Cebu City Anti-Indecency Board (CAIB) sa problema sa gikataho nga “Karton Prostitution” diha sa North Reclamation Area (NRA).
Matud ni CAIB Chairman Doctor Rene Josef Bullecer nga ilang tabangan ang siyudad sa Mandaue sa maong problema tungod kay ang NRA nagdugtong usab sa dakbayan sa Sugbu.
“On behalf sa CAIB we will do our very best nga samtang maningkamot ang Mandaue side pagsumpo ana, ang Cebu City side amo sab nga i-tackle nang maong problema aron once and for all masulbad nato nang problemaha nga nag-involve sa reclamation area sa Cebu ingon man sa Mandaue,” nagkanayon si Bullecer.
Gusto sa CAIB chairman nga regular nga mamonitor ug hipuson ang gitawag og mga “karton girls” diha sa NRA nga morampa panahon sa kagabhion.
Ang gitawag og karton girls mao kadtong mga babaye nga magdala-dala og karton samtang mangita og kostomer diha sa NRA.
Gikataho nga ang maong mga boring magpabayad lang og P50 ngadto sa P250 ngadto sa mga lalaki nga nangita og lawasnong kalipay.
Samtang ang karton nga gidala-dala sa maong mga babaye paabangan usab og tag P10 ngadto sa P20 nga maoy ihapin sa ilang panagtagay.
Dugang P50 usab ang giingong bayad sa gwardiya nga maoy pabantayon samtang ang kustomer ug ang karton girl mag-ipis sa alak sa himaya diha sa suok nga bahin sa NRA.
Kini gihulagway ni Bullecer nga
“Kinahanglan gyud ni og regular o nightly nga pagmonitor ug surveillance unya kung naa gyud then immediately panakpon ni sila bisan vagrancy lang kutob atong mapasaka ana nila nga kaso pero at least naay agi ang City para mahunong na nang maong matang sa open display sa prostitution,” dugang pamahayag ni Bullecer.
Nasayran nga sa miaging buwan, mokapin sa 20 ka mga babaye ang nasikop sa kapulisan sa siyudad sa Mandaue diha sa NRA nga gituuhang nalambigit sa karton prostitution.
Kini giingong gibalhug gilayon diha sa Mandaue City Jail human kapasakai og kasong vagrancy ug kalapasan sa Article 202 sa Revised Penal Code.
- Latest
- Trending
