Garcia mitabang sa biktima sa "Stars"

Giabaga sa Cebu Provincial Social Welfare and Development Office (CPSWDO)  ang gasto sa pagkaon ug pagpuyo sa YMCA sa  mga kabanay sa nalunod nga mga pasahero sa barko nga MV Princess of the Stars (MVPS) sa Sulpicio Lines karong mga panahona.

Si Marivic Garces hepe sa CPSWDO nagkanayon, nga maoy mando ni Gobernador Gwendolyn Garcia nga hatagan og libreng pagkaon ug pagpuyo ang maong mga kabanay ug labaw sa tanan hatagan pa sila og kuwarta nga ilang magastogasto samtang nia sila sa dakbayan.

Si Garces  miingon nga gitabangan nila ang mga kabanay sa paghipos sa mga   gikinahanglang  papeles alang sa ilang claim gikan sa tagdumala sa barkong nalunod.

Midugang si Garces bisan si Kongresista  Pablo John Garcia sa ikatulong distrito sa lalawigan sa Sugbu mipabaha usab sa iyang hinabang ngadto sa mga kabanay.

Si  Glenn Baricuatro, consultant on political affairs ni Kongresista Garcia nga nahinabi sa Banat News nagkanayon nga may pipila usab nga mga molupyo sa ikatulong distrito nga nahilakip sa pagkalunod sa MVPS.

Ang managsoong Garcia milihok sa pagbubo og hinabang sa mga kabanay dihang miprangka na ang kagamhanan sa dakbayan nga dili na sila mohatag og pagkaong libre sa maong mga kabanay.