Castro wa mabalaka sa kasong ‘bribery’

Wala mabalaka si Cebu City Assistant City Prosecutor Mary Ann Castro sa migawas nga resolusyon sa Sandiganbayan nga naglambigit kaniya sa kasong “bribery.”

 Matud pa ni  Castro dugay   nga gi-dismiss sa Court of Appeals  ang maong kaso  ug nahibulong kini nga migawas kini og balik.

 Hinuon ang abogado niini nga si Atty. Antonio Bacalso iya nang gipahibalo nga himuon ang tanang paagi sa pagtubag  sa resolusyon sa Sandiganbayan.

 Usa sa nahunahunaan ni Castro mao ang pagsumiter og motion for reconsideration ngadto sa Sandiganbayan 3rd Division nga naghawid sa maong kaso diin ilang isumiter ang kopya sa pag-dismiss sa CA sa maong isyung bribery nga gipaabot sa Visayas Ombudsman ngadto sa Sandiganbayan.

 Kahinumduman nga si Castro gilambigit sa kasong bribery niadtong Enero 25, 2002 sa dihang gitumbok kini nga nakadawat og P10 mil  gikan  kang  Gines Abellana, abogado sa usa ka drug suspect nga si Nanan Gimenez diin si Castro ang naghawid sa maong kaso. Apan kining tanan gipanghimakak ni  Castro ug gani gibasura kini sa CA.

 Sa milabay’ng Hunyo 30 ning bulana ang 3rd Division sa Sandiganbayan  mipagawas og 22 ka panid sa ilang resolusyon  diin ilang nakita nga adunay igong kapasikaran nga si Castro malambigit sa kasong bribery.