Panday nga nailuga'g kutsilyo gipatay

Usa ka panday ang namatay human mailugi sa kutsilyo sa iya untang gidunggab nga truck boy sa milabay'ng gabii diha sa sitio San Roque barangay Bulacao ning dakbayan.

Ang namatay giila lang sa kapulisan nga si Roger Malinao samtang ang nakapatay kaniya mao si Danilo Ranas, 40, truck boy ug residente sa nahisgutang lugar.

Sa report sa Homicide Section sa Cebu City Police Office si Ranas  miasoy sa mga imbestigador sa kapulisan, naglakaw siya paingon sa usa ka tindahan dihang sa kalit lang mibabag sa iyang agianan si Malinao.

Walay igong rason gidunggab siya niini hinungdan nga naigo siya sa dughan ingon man tuong kamot.

Apan bisan paman kun samaron na siya gisuklan niya si Malinao hangtud nga iyang nailog ang kutsilyo una pa mikaratil og dagan si Malinao maong iya kining gigukod ug nadunggaban makadaghang higayon sa lawas.

Ang duha pulos nalandig sa CCMC apan si Malinao gideklarar nga patay nang nadangat kanila tungod sa samad dinunggaban sa buko-buko, abaga, ingon man sa ulo.

Samtang si Ranas nga nasamdan usab ang gidakop sa kapulisan sulod sa tambalanan.