Gipadaplin lang una sa Cebu City Traffic Operations and Management (Citom) board ang hangyo sa tag-iya sa Foodland nga himoong parking area ang ilawom sa gitukod nga Banilad Flyover.
Kini bisan pa man kung misugot na si Mayor Tomas Osmeña sa maong hangyo, tungod usab sa kaapiki na sa ilang lugar mugna sa gitukod nga proyekto.
Matud ni Citom Executive Director Arnel Tancinco nga dili pa makadesider ang Citom board sa hangyo sa Foodland, tungod kay padayon pa nga gitrabaho ang flyover.
Nagkanayon si Tancinco nga ila pa usab nga tun-an ang sitwasyon sa trapiko diha sa maong dapit kung dili ba makahatag og kahasol sa mga motorista ang parking area.
Sa iyang bahin, ang Vice Chairman sa Citom nga si Rogelio “Jingjing” Osmeña miingon nga angayang pananghiran usab ang Department of Public Works and Highways (DPWH) niini.
“Angayan gyud nga mananghid pud ang tag-iya sa Foodland ngadto sa DPWH kay ila man nang proyekto,” sumala pa ni Osmeña.
Nagtoo hinuon ang vice chairman sa Citom nga dili makabalibad ang DPWH sa tag-iya sa Foodland tungod kay giingong nanginahanglan usab kini sa ilang kooperasyon.
Nasayran nga wala pa mopirma sa entry permit ang tag-iya sa Foodland samtang wala pay kasiguruhan kung asa unya niini pa-parkingon ang ilang mga kliyente.
Ang entry permit gikinahanglan sa kontraktor sa flyover, aron kini makapadayon sa pagpalapad sa dalan partikular na sa isig ka kilid sa nahisgutang proyekto.
Ang kontrobersyal nga flyover gitinguha sa kontraktor (WTG Construction) nga mahuman sa hinapos nga bahin niining buwana.
Daghan hinoon ang nagtoo nga dili matuman ang target date sa kontraktor, tungod kay giingong dako pa ang trabahoonon sa maong proyekto.
Base hinoon sa kontrata, unya pa sa buwan sa Nobiyembre gitakdang mahuman ang flyover nga gisugdan pagtrabaho niadtong buwan sa Pebrero.