Mga barko sa Sugbu luwas sakyan – MARINA

Gipasalig sa taga Maritime Industry Authority (Marina)-7  nga luwas gihapon nga sakyan ang tanang barko nga modunggo dinhi sa dakbayan sa Sugbu.

Kini maoy gitug-an ni Engr. Mardon Martin sa Marina-7 kinsa nagkanayon nga tanang barko nga nagbiyahian sa Sugbu ug sa ubang bahin sa Visayas , Mindanao, ug  Luzon, giluwatan nila  og safety certificate.

Matud ni Engr. Martin nga kun adunay gi-isyu nga safety certificate ang Marina sa usa ka barko, timailhan kini nga luwas nga mobiyahe ang maong barko sa maong kadagatan.

Gitug-an ni Martin nga ang Marina-7 mipahigayon  og annual inspection sa mga barko, aron masiguro nga luwas ang mga pasahero nga mosakay sa maong sakyanan   sa higayon nga molawig kini sa kadagatan.

Samtang sa laing bahin, wala pay nadawat nga kopya ang Marina kalabot sa giingong paglibkas sa kamanduan nga nagdili sa mga barko sa Sulpicio Lines Incorporated (SLI) nga mobiyahe sa kadagatan.

Kini ang giklaro ni Martin human ipahibawo ni Executive Secretary Eduardo Ermita nga duna nay kamanduan si Presidente Gloria Macapagal Arroyo alang sa paglibkas sa baod nga nagdili sa mga barko sa SLI  nga makabiyahe sa kadagatan.

Sa nasayran si Presidente Arroyo misugot na nga mobiyahe ang mga barkong de karga sa SLI gumikan sa hangyo sa mga negosyante, apan wala gihapon tugoti nga makabiyahe ang mga barkong de pasahero  sa nahisgutang kompaniya.