Nadakpan sa kapolisan ang duha ka batan-ong managhigugma-ay didto sa lungsod sa Alcoy nga maoy gisuspetsahang nangawat og kwarta ug mga alahas nga mobalor og P2 milyones sa ilang gitrabahoan didto sa barangay Mahayahay, siyudad sa Lapulapu niadtong Huwebes.
Ang nadakpan mao sila si Daryl Anoling Pelago, 16 anyos,sa barangay Guiwang, Alcoy ug si Joyrel Moreno o Marecel Joy Moreno alyas Irene,18 anyos, lumad nga taga Budlasan, Canlaon, Negros Occidental.
Si PO3 Allan Medel sa Alcoy Police Station nga nahinabi sa Banat News, miila usab sa mga biktima nga mao ang magtiayong si Geremias Yulo Lim ug Lydia Uy Lim,molupyo sa Mahayahay ug negosyante og mga alahas.
Matud sa kapolisan nga ang suspetsado nga si Pelago nagtrabaho sa Mana Sutukil sa Lapulapu nga gipanag-iya sa magtiayong biktima samtang ang hinigugma niining si Moreno maoy katabang sa panimalay sa mga biktima.
Namatikdan ni Lydia Lim nga nahanaw na ang iyang bag nga gibutang sa ilang kwarto nga puno sa mga alahas ug kwarta nianang alas 5:00 na sa hapon niadtong Huwebes nga mao usab ang pagkahanaw sa manag-uyab.
Midangop dayon sila sa kapolisan sa Lapulapu kinsa miresponde usab dayon ug nakig-alayon dihadiha ngadto kang SPO1 Leo Amores sa Dalaguete Police Station kinsa lumad nga taga Lapulapu.
Sila si SPO1 Amores ug SPO1 Edwin Quilaton daling mihimo og follow up operation sa barangay Guiwang ,Alcoy ug nakig-alayon usab dayon ngadto kang SPO3 Primitivo Carunggay, ang deputy chief sa Alcoy Police Station hinungdan nga nadumdoman ang pinuy-anan ni Pelago sa barangay Guiwang nianang pagka alas 9:00 sa gabii.
Nakuha sa kapolisan gikan ni Joyrel mao ang bulawan nga ariyos, necklace ug bracelet nga gibana- banang mokantidad og P102,000 nga diha sa sulod sa gidala niining bag. Gawas niini nabawi usab sa kapolisan ang usa ka parisan sa ariyos nga mokantidad og P3,000, bulawan nga necklace , P35,000; bracelet, P28,000 ug Fusel watch , P6,500.
Matud ni PO3 Medel nga nakahipos usab sila og laing relo nga Fusel dihang ilang gibalik ang balay nga gitago-an sa mga suspetsado nianang pagka alas 10:00. na sa gabii.