Ang mga negosyante og fishball ug tempura sa Sugbu lakip usab sa naapektohan sa pagkalunod sa MV Princess of the Stars (MVPS) sanglit sama sa isda, mihinay usab ang halin niini.
Si Warnito Manabat, 48 anyos, minyo ug lumad nga taga barangay Poblacion, lungsod sa Boljoon kinsa namaligya og fishball ug tempura nga nahinabi sa Banat News kagahapon miingon nga kapin na sa usa ka semana ang paghinay sa halin sa iyang baligya .
Si Manabat miingon nga gikan sa atubangan sa usa ka tulunghaan sa dakbayan, nagbalhinbalhin siya og puwesto abi niya og mokusog sa laing lugar, apan misamot na hinuon ang mga bata dili na gyud molingi sa iyang tinda.
Si Eduardo “Eddie Boy” Flores, hingkod , minyo nga taga barangay Pig-it sa lungsod sa Loon, Bohol miingon nga kinaham unta niya ang isda apan mibiya na siya sa pagkaon niini karon.
Bisan si Oscar Abesar, taga barangay Magsaysay sa dakbayan sa Toledo,temporaryo usab nga mibiya sa pagkaon og isda sa pagtuo nga ang mga isda sa kadagatan mikitkit sa mga tawong nangamatay sa pagkalunod sa barko nga MVPS.